سرپل کې د قشقري نفتو څاګانو څخه د ورځې ۹۰۰ ټُنه نفت استخراجېږي

(نهضت – افغانستان): محمدیعقوب عبدالرحمن اکه، د سرپل ولایت والي؛ د قشقري نفتي تاسیساتو څخه د امنیتي وضعیت د ارزونې په موخه له یادې سیمې لیدنه کړی او د قشقري بلاک یي د هېواد ستره شتمني بللې ده.

د سرپل ولایتي چارواکي وايي چې هره ورځ د دغه ولایت د قشقري نفتو څاګانو څخه ۹۰۰ ټُنه نفت استخراجېږي.

د سرپل والي محمدیعقوب عبدالرحمن اکه، د قشقري نفتو تاسیساتو څخه د امنیتي وضعیت ارزونې په موخه له یادې سیمې څخه د لیدنې پر مهال د قشقري بلاک د هېواد ستره شتمني بللې ده. نوموړي ویلي، چې قشقري د نفتو څاګانې د افغانانو ملي شتمني ده او په عوایدو به یې د هېواد بیارغونه او پراختیا کې ګټه واخیستل شي. په ورته مهال د یاد ولایت والي زیاته کړه چې د قشقري عوایدو یوه برخه د سرپل بیارغونې او پراختیايي پروژو کې لګول کېږي چې په وینا یې، ځینې نورې پروژې هم ترلاس لاندې لري.